Futbol üzrə Nigeriya milli komandasının sabiq yarımmüdafiəçisi Con Obi Mikel karyerasını başa vurduğunu bəyan edib. Corner.az xəbər verir ki, 35 yaşlı futbolçu bu qərarını sosial şəbəkə hesabında açıqlayıb.
Obi Mikel son olaraq Küveytin “Əl-Küveyt” klubunda çıxış edib. O, bu komandanı 2021-ci ilin noyabrında tərk edəndən bəri işsiz idi.
Təcrübəli futbolçu peşəkar karyerasına Norveçin “Lyun” klubunda başlayıb. O, 2006-cı ildə məhz bu klubdan “Çelsi”yə transfer olunub. Nigeriyalı oyunçu düz 11 il London təmsilçisinin uğurları üçün çalışıb. “Çelsi”dən ayrılandan sonra isə o, “Tianjin TEDA”, “Midlsbro”, “Trabzonspor” və “Stoke Siti” klublarının formasını geyinib. Yarımmüdafiəçi Nigeriya yığmasında 91 oyuna çıxıb və 6 qola imza atıb.
