- Xəbər news
- 01:00 22.01.2026
Qış transfer dönəmində “Qarabağ”dan Rusiyanın “Krasnodar” klubuna keçən Kadi Borges instaqram səhifəsi vasitəsilə vida mesajı yayımlayıb. Corner.az saytı xəbər verir ki, braziliyalı yarımmüdafiəçi Azərbaycan çempionuna təşəkkürünü bildirib.
“Bir gün hər şey bitir, başqa mərhələ bağlanır. Demək istədiyim hər şeyi yazsam, sətirlər əskik qalar. Çünki Azərbaycanda yaşadıqlarım indiyə qədər həyatımda ən çılğın və ən gözəl anlardan biri idi.
Klub üçün mübarizə apardığım dövrlərdə mənə verdiyi hər şeyə “Qarabağ” klubuna, hər gün yanımda olan oyunçuların hər birinə və mənə kömək olan bütün heyətə ürəkdən təşəkkürümü bildirirəm. Ora gələn Kadini yeni Kadiyə çevirməyi bacardığınız üçün təşəkkür edirəm” - deyə, Kadi bildirib.
26 yaşlı futbolçu sonda azarkeşlərə də təşəkkür etməyi unutmayıb: “74 oyunda 28 qol, 28 məhsuldar ötürmə, ölkə çempionluğu, kubokun qalibi, çempionatın bombardiri və mövsümün ən yaxşı oyunçusu olduğum üçün uğur hissi ilə klubdan ayrılıram. Başımı dik tuturam. Təsəvvür etmədiyim şəkildə məni qucaqlayan azarkeşlərə xüsusi təşəkkürümü bildirirəm. Siz həyatımızda bənzərsiz idiniz. Mən, həyat yoldaşım və ailəm sizinlə keçirdiyimiz hər anı evimizdə xüsusi yerdə yaşadacağıq.
Bu gün karyeramda yeni çağırışa və dönəmə keçirəm. Məni hər gün təəccübləndirdiyi üçün Tanrıya şükür edirəm. Onsuz bunların heç birinin mümkün olmayacağına əminəm.
“Qarabağ” klubuna, məşqçi heyətinə, futbolçularına və azarkeşlərinə sevgi və sonsuz ehtiramımı bildirirəm, hamınıza uğurlar arzulayıram. Daha sonra yenidən görüşmək diləyi ilə. Əsla vida olmayacaq.
Ayrılmağımla bağlı mediada çıxan hər şeyə inanmayın. Bu kanalların heç biri həqiqəti demir. Bir gün hər şeyi izah edəcəyəm və sizə əslində nə baş verdiyini danışacağam”.
