Onları beynəlxalq arenadakı çıxışlarından tanıyıram

"Özümü "Qarabağ", "Sabah", "Neftçi" kimi güclü komandalara qarşı oynamağa motivasiya etmişəm".

Corner.az-ın məlumatına görə, bunu "Turan Tovuz"un yeni transferi Denis Marandiç Peşəkar Futbol Liqasının rəsmi yutub kanalına müsahibəsində deyib.

Moldovalı müdafiəçi Azərbaycandakı iddialı komandaların avrokuboklardakı bəzi matçlarını izlədiyini bildirib: "Onları beynəlxalq arenadakı çıxışlarından tanıyıram. Düşünürəm ki, çətin olacaq. Ən yaxşı oyunumu göstərməyə çalışacağam".

27 yaşlı oyunçu Tovuz təmsilçisində özünü xoşbəxt hiss etdiyini vurğulayıb: "Hamı məni çox yaxşı qarşıladı. Tam motivasiyalıyam, həqiqətən yaxşı kollektivimiz var. Antalyada ciddi hazırlıq keçdik. İnanıram ki, hazırkı çıxışımızı çempionat matçlarında da davam etdirib qarşıya qoyulan hədəflərə çatacağıq".

Yoxlama matçlarında 2 qola imza atan Marandiç komandanın uğurunu şəxsi göstəricilərdən üstün tutduğunu söyləyib: "Qol vurub komandama kömək etdiyim üçün xoşbəxtəm. Düzdür, ilk növbədə müdafiəçiyəm. Amma vəzifələrimdən biri hücuma dəstək verməkdir. Önəmli olan rəsmi qarşılaşmalarda fərqlənməkdir. Həmin matçlarda daha yaxşı oynamalıyıq. Düzdür, fərdi nailiyyətlər də vacibdir. Amma ən birinci komandanın nəticələridir".

Təcrübəli futbolçu tovuzlu azarkeşlərdən də danışıb: "Onların önündə oynamaq xoşdur. Tovuzlu fanatlar barədə eşitmişəm. Bilirəm ki, komandamızın yaxşı dəstəyi var. Onların qarşısında çıxış etməkdən məmnun olacağam".

Qeyd edək ki, Denis Marandiç 2020-ci ildən çıxış etdiyi Moldova millisində 6 oyuna çıxıb.