Bakıda idman federasiyalarının məşqçi və həkimləri üçün seminar keçirilir

Gənclər və İdman Nazirliyinin təşkilatçılığı ilə Bakıda idman federasiyalarının məşqçi və həkimləri üçün seminara start verilib.

Nazirliyin mətbuat xidmətindən Corner.Az-a bildirilib ki, “Kardiologiya” və “Müalicəvi idman və idman təbabəti” üzrə tibb elmləri doktoru Yelena Dorofeyevanın iştirakı ilə keçirilən seminara federasiyaların 50-dən çox nümayəndəsi cəlb olunub.

Əsas mövzusu Yay Olimpiya və Paralimpiya oyunlarına hazırlıq dövründə tibbi təminat olan seminar idmançıların fiziki yükə fərdi uyğunlaşmasına təsir edən faktorlar; məşq prosesinin qeyri-səmərəli planlaşdırılması zamanı olan patologiya önü və patoloji vəziyyətlər; yüksək idmanda biokimya; idmançılarda immunitet vəziyyətinin modifikasiyası və korreksiyası; idman qidalanmasının təşkilinə müasir yanaşmalar; müasir idmanda idman qidalanması problemləri, idmançıların səmərəli qidalanmasının prinsipləri və digər mövzuları əhatə edəcək.