Millinin yeni baş məşqçisi konfransda çıxış edib

Qadınlardan ibarət Azərbaycan millisinin yeni baş məşqçisi və bir sıra idman mütəxəssisləri mətbuat konfransında çıxışlar edib, önəmli fikirlər səsləndiriblər.

Corner.az-ın məlumatına görə konfransda çıxış edən yeni baş məşqçi Ataman Güneyligil göstərilən etimada görə təşəkkür edib:  

“Mənə göstərilən inama görə təşəkkür edirəm. Azərbaycan voleybolunun əvvəlki uğurlarını qaytarmaq istəyirik. Faiq Qarayevin dövründə yaxşı nailiyyətlər əldə olunub".

Həmçinin o, avqust-sentyabr aylarında təşkil ediləcək Avropa çempionatında yaxşı komandaların yer aldığı qrupda mübarizə aparacaqlarını söyləyib. Eyni zamanda, gənclərin voleybola cəlb edilməsinin ön planda olacağını vurğulayıb:

“Yerli məşqçilərlə fikir mübadiləsi aparmaq üçün seminarlar təşkil olunacaq. Bunlar yay dövrü üçün nəzərdə tutulub”.

Qeyd edək ki, Azərbaycan millisi Avropa çempionatının C qrupunda Çexiya, Almaniya, Yunanıstan, İsveç və Türkiyə ilə mübarizə aparacaq.